2Ki 11 | NdeIBE | STEP | U-Athaliya unina ka-Ahaziya wathi ebona ukuthi indodana yakhe isifile, waqhubeka ebulala bonke abendlunkulu.

2 Kings 11

U-Athaliya loJowashi

1 U-Athaliya unina ka-Ahaziya wathi ebona ukuthi indodana yakhe isifile, waqhubeka ebulala bonke abendlunkulu. 2 Kodwa uJehosheba, indodakazi yenkosi uJehoramu njalo engudadewabo ka-Ahaziya, wathatha uJowashi indodana ka-Ahaziya wamnqenqisa emsusa phakathi kwamakhosana ayesezabulawa. Wamfihla kanye lomlizane wakhe endlini yokulala emcatshisa ukuze u-Athaliya angaze ambona; yikho kasazange abulawe.

3 Wahlala ecatshisiwe yena kanye lomlizane wakhe ethempelini likaJehova okweminyaka eyisithupha yokubusa kuka-Athaliya.

4 Ngomnyaka wesikhombisa uJehoyada wamema abalawuli bamakhulu, amaKharithi kanye lababalindi, bonke balethwa phambi kwakhe ethempelini likaJehova. Wenza isivumelwano labo wabafungisa ethempelini likaJehova. Wasebatshengisa indodana yenkosi.

5 Wabalaya wathi, “Nanku elizakwenza: Lina elikumaviyo amathathu azabe elindile ngeSabatha, ingxenye yokuthathu yenu abalinde isigodlo, 6 lengxenye yokuthathu abaseSangweni laseSuri, lengxenye yokuthathu esangweni elingemuva kwabalindi, abazophisanayo ukulinda ithempeli, 7 lani elikumaviyo amabili okuvame ukuthi lingasebenzi ngeSabatha, lonke lizalinda ithempeli likaJehova. 8 Lizalinda lizingelezele inkosi, ngulowo ehlomile ngesikhali sakhe esandleni sakhe. Loba ngubani osondela kini kumele abulawe. Hlalani liseduze kwenkosi loba ingaze iye ngaphi.”

9 Abalawuli bekhulu benza njengokulaywa kwabo nguJehoyada umphristi. Ngamunye umlawuli wathatha iviyo lakhe lamadoda lawo ayesiya ekulindeni ngeSabatha lalawo ayezakuba engasebenzi eza kuJehoyada umphristi. 10 Ngakho yena wanika abalawuli imikhonto lamahawu ayengawenkosi uDavida ayegcinwa ethempelini likaJehova. 11 Kwathi abalindi ngamunye, ephethe isikhali esandleni sakhe, bajama bephahle inkosi iseduze kwealithare lethempelini, kusukela ezansi kusiya enyakatho yethempeli.

12 UJehoyada waseveza indodana yenkosi wayethwesa umqhele; wayiqhubela lesivumelwano sikaJehova wahle wamemezela ukuba isiyinkosi. Bayigcoba inkosi, abantu batshaya izandla bahlaba umkhosi besithi, “Mpilo ende enkosini!”

13 U-Athaliya uthe esizwa umkhosi wokujabula kwabalindi kanye labantu bonke, waya ebantwini ngasethempelini likaJehova.

14 Uthe ethi mehlo suka, wabona nansi inkosi, yayimi eduze kwensika njengomkhuba. Izikhulu labatshayi bamacilongo babesekele inkosi, abantu bonke bejabula ngokutshaya amacilongo. Ngakho u-Athaliya wadabula izambatho zakhe wamemeza esithi, “Ukuhlamuka! Ukuhlamuka!”

15 UJehoyada waselaya abalawuli bekhulu, ababelawula amabutho wathi: “Mkhupheni limfake phakathi kwamaviyo amabutho limhlasele ngenkemba lowo ozama ukumlandela.” Kuyikuthi umphristi wayethe, “Akumelanga abulawelwe ethempelini likaJehova.” 16 Ngakho bamdumela ekufikeni kwakhe endaweni lapha okungenela khona amabhiza esigodlweni, kulapho abulawelwa khona.

17 UJehoyada wasesenza isivumelwano phakathi kukaJehova lenkosi kanye labantu ukuthi bavume ukuba ngabantu bakaJehova. Wenza njalo isivumelwano phakathi kwenkosi labantu. 18 Abantu bonke belizwe baya ethempelini likaBhali bafika balidilizela phansi. Babhidliza ama-alithare lezithombe kwaba yizicucu, babulala uMathani umphristi kaBhali phambi kwama-alithare. Ngakho uJehoyada umphristi wasebeka abalindi ethempelini likaJehova. 19 Wathatha abalawuli bamakhulu, amaKharithi, abalindi labantu bonke belizwe, sebendawonye behla lenkosi ethempelini likaJehova baya layo esigodlweni, bengenela esangweni labalindi. Inkosi yasithatha indawo yayo esihlalweni sobukhosi, 20 abantu bonke belizwe baba lokujabula okukhulu. Kwaba lokuthula emzini, ngoba u-Athaliya wayesebulewe ngenkemba esigodlweni.

21 UJowashi waqalisa ukubusa eleminyaka eyisikhombisa.